Logo

बिहीबार , साउन २६ गते २०७९

उद्यमशीलताको सोच हुने विश्वविद्यालयका विद्यार्थीले अवसर पाउने

उद्यमशीलताको सोच हुने विश्वविद्यालयका विद्यार्थीले अवसर पाउने

कालीगण्डकी खबर

१९, साउन २०७९
  • 184
    SHARES
  • उद्यमशीलताको सोच हुने विश्वविद्यालयका विद्यार्थीले अवसर पाउने

    काठमाडौँ, १९ साउन । विश्वविद्यालय तहमा अध्ययनरत विद्यार्थीसँग उद्यमशीलताको सोच छ तर पुँजीको अभावमा त्यसलाई कार्यान्वयन गर्न नसक्नेलाई अवसर दिइने भएको छ ।
     
    विश्वविद्यालय तहका विद्यार्थीबाट उद्यमशीलताको सोचको प्रतिस्पर्धा गराई छानिएकालाई लगानीको वातावरण बनाउन लागिएको हो । ‘कलेज आइडिया हन्ट २०२२’ का लागि अनलाइन आवेदन खुला गरिएको आइडिया स्टुडियोले आज आयोजना गरेको पत्रकार सम्मेलनमा जानकारी गराइयो ।
     
    पत्रकार सम्मेलनमा आइडिया स्टुडियोका कार्यकारी अध्यक्ष डा छिरिङ लामाले स्नातक, स्नातकोत्तर, दर्शनाचार्य र विद्यावारिधि तहमा अध्ययनरत विद्यार्थीले प्रतियोगिताका लागि अनलाइन माध्यमबाट उद्यमशीलताको सोच प्रस्तुत गरेर प्रतिस्पर्धामा सहभागी हुनसक्ने जानकारी दिनुभयो । आइडिया स्टुडियोले सन् २०१४ देखि यस्तो प्रतिस्पर्धा गर्दै आएको छ ।

    images
    images

    प्रतिस्पर्धामा सहभागी भएर जित्नेले उद्यमशीलताका माध्यमबाट २०० जनासम्मलाई रोजगारी दिएको उदाहरण पनि कार्यक्रममा उहाँले प्रस्तुत गर्नुभयो । यो कार्यक्रमका लागि आइडिया स्टुडियाले राष्टिय युवा परिषद्, विश्ववन्यजन्तु कोष, त्रिभुवन विश्वविद्यालयलगायत निकायसँग सहकार्य गर्दै आएको छ । 

    कार्यक्रममा परिषद्का उपाध्यक्ष सुरेन्द्र बस्नेतले १६ देखि ४० वर्षबीचको युवा उमेरका जनसङ्ख्या ४० प्रतिशतभन्दा बढी रहेकाले युवालाई उद्यमशीलतामा आकर्षित गरी स्वदेशमै राख्ने नीतिअनुसार सहकार्य भइरहेको बताउनुभयो । हाल देशमा १० प्रतिशत युवाले मात्र रोजगारी पाउने गरेका छन् । बाँकी युवा विदेश जाँदा रचनात्मक काममा जनशक्तिको अभाव हुने गरेको छ । 
     
    त्रिभुवन विश्वविद्यालय स्कूल अफ म्यानेजमेन्टका उपनिर्देशक डा गङ्गाराम विश्वकर्माले शिक्षा सिद्धान्तमा आधारित हुँदा विद्यार्थीले प्रायोगिक र व्यावहारिक ज्ञान पाउन नसकेको बताउनुभयो । शिक्षालाई अनुसन्धान र व्यावहारिक ज्ञानमा पनि जोड्नुपर्ने उहाँको भनाइ थियो । 
     
    यसअघि उद्यमशीलताको उत्कृष्ट सोच अघि सारी विजेता बन्न सफल उत्पला क्राफ्ट्सकी संस्थापक डोल्मा शेर्पाले एक जनाको सोचले के हुन्छ र भनेर नबसी अघि बढे सफलता पाउन सकिने अनुभव सुनाउनुभयो । विगतमा यस्तै प्रतियोगितामा विजयी हुनुभएकी विजेता अंशु प्रधानले अहिले बेत बाँसबाट बन्ने उद्योगका माध्यमबाट राम्रो आयआर्जन गर्न सफल भएको जानकारी गराउनुभयो ।
     
    कार्यक्रममा विश्व वन्यजन्तु कोषका देशीय प्रतिनिधि डा घनश्याम गुरुङले अब उद्योग व्यवसाय सञ्चालन एवं विकास निर्माणका काम गर्दा वातावरण मैत्री हुने गरी काम गर्नुपर्नेमा जोड दिनुभयो ।

    सन् २०१४ देखि सुरु भएको यो कार्यक्रममा हालसम्म २०० कलेजका दुई हजार ५०० विद्यार्थीले करिब ८०० उद्यमशीलताको सोच प्रस्तुत गरेको जानकारी पनि कार्यक्रममा गराइएको थियो ।

    प्रकाशित मिति :साउन १९, २०७९ बिहीबार - १७:४१:०५ बजे

    सूचना: kaligandakikhabar.com मा प्रकाशित सामग्रीहरु हुबहु वा तोडमोड गरी प्रकाशित गरेको अवस्थामा प्रतिलिपि अधिकार ऐन २०५९ आकर्षित हुनेछ । अनाधिकृत तवरले प्रकाशन गरेको भेटिएमा कानूनी कारवाहीको प्रक्रिया थालिनेछ ।

    कालीगण्डकी खबर

    Copyright © All right reserved to kaligandaki Khabar Site By: SobizTrend Technology